Tujuh Alasan Mangapa Tahun Ini Wajib Natalan deng Kunci Taong di Ambon

Oras-oras dekat Natal deng Kunci Taong bagini, tentu banyak dari katong yang sedang mempersiapkan agenda liburan akhir tahun. Ada yang mau ke luar negeri, ada yang mau pulang kampung, ada lai yang mungkin cuma sekadar mau ator liburan dalam kota, dan lain sebagainya.

Mar beta mau bilang for ale dong samua bahwa daripada ale dong sibuk mikir deng kapala saki atur kepeng for mau tourney ka mana, lebe bae ale dong datang ke Ambon  sa.
Kenapa Ambon? Lantaran Ambon memang manis. Ambon memang seng ada lawang. Apalagi kalo su Natal deng Kunci Taong bagini. Ado mama eee  jang bilang akang lai kawane. Seng percaya? Ini beta kasih bocorannya.

1. Pohon Natal deng Pesta Kembang Api

Oma, opa, bu, usi, ade deng kaka dong pasti takage ancor panggal kalo libur Natal deng kunci taong di Ambon. Supaya dong tahu aja, pohon natal ini wajib ada. Bukan di dalam rumah deng halaman gereja saja. Tetapi di jalan-jalan, di tanjung, di teluk-teluk deng di gunung-gunung mar ada. Seng percaya? Coba ale dong sore-sore menyorong diri kasana di Amahusu. Tepat di mulut Kota Ambon itu, ada pohon natal besar dengan lampu warna-warni dan bintang di pucuknya, pas di ujung jembatan, di atas laut.
Bayangkan bagaimana indahnya. Pesta kembang api? Hmmm… jang bilang akang lai. Kemeriahan satu ini pada taong lalu menduduki peringkat keenam, sebagai pesta kembang api paling meriah se jagad raya. Coba ale dong bayangkan bagaimana meriahnya?

  

2. Jembatan Merah Putih (JMP) 

Walaupun jembatan satu ini dia pung nama seng talalu kana di beta pung hati, tapi ya sudahlah seng urah urus beta pung hati, sebab seng nyambung. Tapi beta mau tabaos for dong samua bahwa jembatan ini seng ada duanya di Indonesia. Yang bisa saingi cuma mangkali jembatan Sydney Harbour di negara Osetaralia saja kaapa. Di jambatan ini ale dong bisa pasang aksi, bagaya pica-pica, foto selfie, cimi-cimi, biking muka laipose atau manja-manja badaki deng ale dong pung pasangan terindah. Apalagi kalo malam, ya Tuang Isa lampu warna-warni sepanjang jembatan akang bikin tambah romantic kaya gimana getoh. 
Balom lai rencananya, kunci taong kali ini, Mr. Presiden Joko Widodo akang hadir di Ambon, laki-laki karempeng ini akan  datang di jembatan yang akan dipakai sebagai salah satu titik pelaksanaan pesta kembang api kunci taong di Kota Ambon. Sadap ka seng? Benar-benar megah deng mempesona to?.
Jadi seng usah buang kepeng banyak-banyak for pi lia kembang api di Sydney Herbour Bridge. Cukup ke Ambon sa. Karena selain ale dong puas liat kembang api, ale dong juga bisa membayangkan sedang berada di Amerika. Ini seng kewel bu deng usi. Sebab jembatan yang membelah teluk Ambon ini  jua akang mirip-mirip deng Golden Gate, San Fransisco. Hahai…. Seng percaya ya buktikan sandiri jua kio.

3. Nikmati Lagu Natal Terbaik di City Of Music

Ale dong samua su pasti pernah dengar atau baca tentang Ambon City of Music. Woe, ini bukang tulisan di pinggir pante dekat Laha sana. Ini predikat yang katong mau capai di masa depan. Memang masih jauh sih. Tetapi sebagi sebuah cita-cita tentu katong akang seriusi akang. Iyo to pak walikota?

Ambon memang kota music. Orang-orangnya? Hmmm… samua penyanyi. Alamnya? Ao… jang bilang akang lai. Dong bilang Tuhan menciptakan Ambon sambil tersenyum. Ada lai yang bilang Ambon adalah sepotong surga yang jatuh ke bumi kok. Jadi buat ale dong yang ngebet abis mau merasa terberkati oleh lagu-lagu Natal berkualitas, ya tempat paling tepat adalah Ambon. Apalagi taong ini kalangan seniman Maluku akang bikin sekian acara deng tema basarnya: “I play my best for him”. Akang pung arti apa? Dong cari bu Rudi fofid kong Tanya antua. Eh sebelum lupa yang mau nonton acara ini segera ke Ambon tanggal 20 Desember jang laste.
Kalo ale dong kebetulan beragama Sarani, beta cuma bilang jang sampe ale dong manyasal kong mati nanti malaikat tanya su pernah iko natal di Ambon ka balong.  Ibadah Natal di Ambon itu, Tuang Ala Bapa Kami yang di Surga, jang bilang akang lai. Ibadah deng puji-pujian trus nyanyiannya keren-keren. Ambon su pasti menyajikan kepada ale dong samua lagu-lagu pujian saat ibadah. Terutama ibadah malam Natal, deng sombayang kunci taong. Ado doee, setiap sektor, setiap anggota jemaat sampe kelompok anak-anak akan berlomba-lomba menampilkan pujian terbaik mereka kepada Tuhan di waktu-waktu ibadah tersebut. Masih ragu for mangente Ambon?

4. Ada Sinterklas deng piet itam

Su sejak barapa hari lalu, sinterklas deng rombongan-rombongan bajalang kuliling kota. Sampe di gang-gang, di rumah-rumah. Ini salah satu tradisi yang berkembang di Ambon entah sejak kapan, beta juga seng tau. Tradisi kunjungan sinterklas atau santa claus ke rumah-rumah untuk membagikan hadiah for ana-ana kacil. Samua gereja di Ambon hampir pasti punya Sinterklas.
Yang bikin unik deng heboh nih kalo sinterklas datang bawa piet itam atau swaterpit. Ana-ana kakacil bisa lari nagka-angka rok deng mananis tahek-hek lantaran tako pung karja. Ini maksudnya apa e? Sinterklas datang bawa hadiah natal. Mar sapa yang mau ambe hadiah musti dapa marah dari piet itam dolo. Untung jua sinterklas pung hati bae kong bawa bidadari lai.

 

5. Pegang Tangan Natal deng Tahun baru. Maksudnya?

"Katong pi pegang tangan natal dang taong baru dolo". Kalimat spanggal ini pasti ale dong dengar akang kalo natalan deng kunci taong di Ambon. Inilah Ambon, susasana silaturahim seng hanya ada waktu lebaran. Ini ciri orang Ambon yang masih kantal deng suasana kekeluargaan deng persaudaraan. Cukup bermodalkan baju rapi, ale dong boleh masuk ke sabarang rumah. Seng baku kanal? Oh… seng masalah. Ale dong boleh ucap salam, masuk rumah pegang tangan dudu bacarita lalu nikmati hidangan deng keramahan tuan rumah. Seng cukup sampe di situ, kadang tuan rumah yang kaya dong seng lupa kasi pegang ale dong kepeng.

 

6. Nikmat Pesona Kota dan Keindahan Alam

Ada banyak alasan mengapa ale dong musti natalan deng kunci taong di Ambon. Tetapi yang beta bisa kasi tau for ale dorang adalah bahwa Ambon terlalu banyak mempunyai huk-huk melankolis. Ini saintifik, ilmiah. Kalau seng percaya, coba tanyakan teman, rekan, atau basudara yang pernah menetap di Ambon. Mereka pasti akan bilang bahwa tiap sudut kota meninggalkan rindu dendam yang jauh lebih mematikan daripada tertusuk duri babi.
Pernahkah kalian merasakan memandang senja yang beranjak rubuh di Pantai Latuhalat? Memandang matahari turun seraya menikmati sejuk sore di Tugu Cristina Martha Tiahahu?. Berbincang deng nona mata garida yang kalian cintai selama menahun, makan rujak sepiring berdua di Pantai Natsepa atau berenang di pantai Hunimua yang berpasir putih. Ah, mungkin itu cuma beta saja kaapa?. Tapi memang ambon punya banyak pesona dan keindahan yang sulit untuk dilupakan.

 

7. Bonus Wisata Religi

Bagi dong samua yang ingin lebih mendekatkan diri kepada Tuhan. Di Ambon banyak sekali tempat-tempat keagamaan yang menyimpan sejarah dan cerita panjang keagamaan. Mau ale dong Salam atau ale dong Sarani jang tako. Samua ada di Ambon. Mulai dari gereja Silo, gereja Maranatha, Katedral  hingga gereja Imanuel di Hila sebagai gereja tertua di Provinsi Maluku, ada samua. Ada masjid-masjid bersejarah seperti Masjid Raya Al'Fatah, Islamic center, Masjid Jamiek  hingga masjid tertua Wapauwe di Kaitetu. Sejarah penyebaran agama-agama samawi di Maluku juga bisa ale dong pelajari jika berkunjung ke Ambon. Mulai dari perjalanan Xaverius hingga Josef Kam dan lain-lain masih bisa ditemukan di Kota Ambon.

Pokoknya Setiap sudut kota Ambon maupun orang-orangnya mempunyai cerita masing-masing. Jadi beta jamin 1000 persen bagi siapa pun yang merayakan liburan Natal deng Kunci Taong kali ini di Ambon seng akan pernah menyesal. Justru sebaliknya ale dong samua akang jatuh cinta dan sulit melupakan kota di tepian laut ini. (*)

*tulisan ini merupakan adaptasi dari  tulisan Joel wakano